Asociación Cultural Mirándolle os Dentes

Esta asociación foi creada por un grupo de amigos afeccionados aos veículos clásicos e namorados das feiras do automóbil de ocasión, que tanta fama deron no seu momento ao noso pobo. A nosa ilusión é conseguir que Pontecesures sexa coñecido polas súas feiras do automóbil antigo e facernos cun oco dentro do calendario das grandes feiras deste tipo que se celebran en España.

Ao mesmo tempo, trataremos de fomentar eventos relacionados con este mundo, e trataremos de recuperar o pouco patrimonio que quede no noso pobo de veículos antigos.

José Carlos Potel Saborido
Presidente da Asociación Cultural Mirándolle os Dentes

Historia das feiras do automóbil de Pontecesures

No ano 1925, un grupo de amigos –veciños de Pontecesures– comezaron a pensar na idea de realizar unha feira do automóbil. Esta idea xurdiu ao decatarse que nas feiras cabalares que se celebraban na zona, no medio dos cabalos había algún veículo á venda, polo tanto, se hai feiras de cabalos –que eran o medio de transporte da época– por que non podía haber feiras de automóbeis que xa comezaban a verse nas nosas rúas.

Con este pensamento, o sr. Eugenio Escuredo e o sr. Salvador Sierra, desprázanse ate a cidade alemá de Leipzig, onde se celebraba unha feira destes cacharros chamados automóbeis. Á súa volta de Alemaña contan aos seus amigos todo o visto e póñense a traballar. O día 27 de xuño de 1925 inaugúrase a Feira do Automóbil de Ocasión na que se presenta o primeiro automóbil que circulou por Galicia.

Durante tres días a Feira é visitada por máis de 10.000 persoas. Están expostos un total de 598 veículos e o seu valor supera os 5 millóns da época.

O éxito é total e ten unha grande repercusión nos medios de comunicación. Esta Feira está recoñecida como a primeira das súas características celebrada en España. Con ela colaboraron artistas da talla de Carlos Maside, Castelao, Oria Moreno, Granell, etc.

A día de hoxe, moitas rúas de Pontecesures levan os nomes daqueles que fixeron posible as feiras do automóbil de ocasión. Este é o noso pequeno homenaxe para todos eles, amantes dos veículos e do seu pobo: Eugenio Escuredo, Salvador Sierra, Víctor García, Ramón Piñeiro, José Novo, Jesús Cabeza, José Sierra, Baldomero Carlés, Luis Diéguez, Ramón Diéguez, Luciano García, Carlos Morales e Feliciano Touceda.

(Datos recollidos do libro "Historia das Feiras do Automóbil de Ocasión" do autor: D. Xosé Piñeiro Ares. Editado en 1989).